الولد نايم

الولد نايم لكن ... ف حالة صحيان معقولة ومقبولة

نايم لكن ف يقظة كيانية وجودية ... حقيقية محبوبة

وشايف إيد شفافة خلف الستارة البيضا

ماسكة الشمس والقمر ...

والسما والأرض ...

والغيوم والنجوم

والأيد التانية ساند عليها الولد

راسه وإحساسه وقلمه وكراسه ... !

وجيه عطا

على باب الله

صحيح أنا نايم ... لكن على باب الله اللي كله خير
مطمن ورايق أحسن من أمير
ولا شايل سلاح وقلقان م اللصوص زي الغفير
ولا خايف يعزلوني زي الوزير
وراضي بلقمة حاف وكوز مية م الزير
مطمن ورايق أحسن من أمير
دانا على باب الله اللي كله خير
وجيه عطا